IZEN EMATEA, EKAINAREN 1EAN ZOZKETA BIDEZ

Kaixo Gorbeiazale!
Udaberria aurrera doa eta laster da iritsiko da Gorbeia Suzien Ternua 2017rako izena emateko unea. Ildo horretan, beste berrikuntza batekin gatoz aurten: lehen aldiz, lasterketa nagusirako izen ematea zozketa bidez egingo dugu.

Azken urteetan mendi-lasterketek izan duten gorakada txoko guztietan nabari da, eta gurean ere bai. Pozgarria da izena emateko webgunea aktibatu eta dortsalak ziztuan amaitzea, baina jende asko aukerarik gabe geratzen da berehala. Horregatik erabaki dugu aurten, zozketa bidez egitea, parte hartu nahi duten guztiek aukera eta baldintza berak izan ditzaten.

Zozketan parte hartzeko, ezinbestekoa izango da aurretik izena ematea. Horretarako epea ekainaren 1ean, goizeko 08:00etan, zabalduko da, www.kirolprobak.com atarian, eta ekainaren 4an, 22:00etan, itxiko da.

Hauek dira zozketa arautuko duten irizpideak.

Lasterketa nagusirako dortsal kopuruak:

– Zozketa bidez 450 dortsal banatuko dira.

– Antolakuntzak 100 dortsal gordeko ditu lasterketak berezko dituen betebeharrei erantzuteko (eliteko korrikalariak, babesleak, zirkuituko korrikalariak…).

– Gorbeia Suzien Ternua 2017 Europako Txapelketa dela eta, ISFk 50 dortsal banatuko ditu.

Izena emateko prozesua:

Ekainaren 1ean, 08:00etan zabalduko da izena emateko epea, Kirolprobak atariaren webgunean (www.kirolprobak.com), eta ekainaren 4an, 22:00etan itxiko da. Zozketan parte hartzeko ezinbestekoa da izena ematea.

Zozketarako zenbakiak:

– Izena ematen duen korrikalari bakoitzak zozketarako zenbaki bat izango du.

– Aurreko urteetan dortsala izan duten korrikalariek beste zenbaki bat izango dute dortsala izan duten urte bakoitzeko.

– Izena ematen duten arratiarrek ere beste zenbaki bat izango dute zozketan. Oharra:

errolda ziurtagiria bidali beharko dute gorbeiasuzien@gmail.com-era ekainaren 4ko 22:00ak baino lehen.

– Suzien Mendi Klubeko bazkideek ere beste zenbaki bat izango dute zozketan.

Zozketa:

Zozketa ekainaren 5ean egingo da Zeanuriko udaletxean. Zenbakien zerrenda zozketa egin aurretik argitaratuko da. Zozketa nominala izango da eta zenbaki guztiak modu aleatorioan aterako dira. Ordena errespetatuz, lehenengo 450ek eskuratuko dute dortsala. Hurrengoak itxaron zerrendan geratuko dira zozketan ateratako ordena berean.

Dortsal banaketa gardena eta publikoa izango da eta nahi duenak edozein unetan jakin ahal izango du zerrenda nola antolatu den eta zer aldaketa izaten diren bertan. Zozketan hautatu suertatzen direnek bost eguneko epea izango dute izen ematea osatzeko. Hala egin ezean, itxaron zerrendako azken postura pasatuko dira. Itxaron zerrendan egonik dortsala eskuratzen dutenek ere bost eguneko epea izango dute izen ematea osatzeko. Hala egin ezean, itxaron zerrendako azken postura pasatuko dira haiek ere.

Betebeharrak eta eskubideak:

Lasterketan izena ematen duten korrikalariek lasterketaren eta ISFren araudiak errespetatzeko konpromisoa hartuko dute, eta trukean, lasterketan parte hartzeko eskubidea eskuratuko dute. Dortsala jasotzerakoan gauzatzen da eskubide hori. Dortsala pertsonala da eta ezin zaio beste inori eman. Horregatik, lasterkariak berak jaso beharko du, jatorrizko NA erakutsiz (mendian federatuta daudenek bazkide txartela ere erakutsi behar dute), finkatutako ordu, toki eta araudiaren arabera. Federatuak dira ISFk aitortutako mendi federazioren bateko aurtengo bazkide txartela duten pertsonak.

Dortsala batzeak eskubidea ematen du antolakuntzak eskaintzen dituen zerbitzu eta opariak jasotzeko. Itxaron-zerrendan dauden lasterkarien opariaren tamaina ez da bermatuko.

Dortsalak itzultzea:

– Dortsala abuztuaren 31 baino lehen itzuliz gero, ordaindutakoaren %80 berreskuratuko da.

– Dortsala abuztuaren 31 eta irailaren 30a artean itzuliz gero, ordaindutakoaren %70 berreskuratuko da, itxaron-zerrendako beste lasterkari batek hutsunea betetzen badu.

Oharra: lasterketa laburrerako izena emateko araudia geroago argitaratuko da.

Besterik ez oraingoz. Ekainaren 1ean hasiko da festa!